محتاج أفضفض كلمات مسعد سليم

                 محتاج أفضفض
مسعد سليم
=================
حتَّىٰ القصيدَه والشَّغف بيها
من مُدَّه حاسس انُّهم قَلُّوا
طَعم الحياه نفسُه ومعانيها
عاملين حداد وعَنُّه ما اتخَلُّوا
محتاج افَضفَض بسِّ متردِّد
مش جُبن منِّي لكنِّي بأجدِّد
في صبر طال  وبقولُّه ما يبعد
مهما الجراح وآلامي يتسلُّوا
وبقول لنفسي إنت ليه زعلان
من عُمر شارب سَلسَبيل المُرِّ
تفرق فـِـ إيه زيادَه حَبَّه كمان
قال يعني زعلك راح يخلِّيه يسُرِّ
لو كان في نِيَّه كان زمانُه بَيِّن
والفرح كان جانا أو بالقليل عَيِّن
والقلب كان لجلُه فرحان ومِتحَيِّن
مش حُزنُه تُوب عَمَّال يطول ويكُرِّ
العيب في مين جاوبينا يا دُنيا
فـِـ اللي داقوا طَعمِك الصَّبار
ولَّا فْــ بشر  خلُّوا نارك حاميَه
وان يوم طفيتي جدِّدوا المشوار
العيب في مين أرجوكي جاوبينا
حسِّي بوجع أصيل كأسامينا
قولي وبوحي خُدي الثَّواب فينا
ولَّا انتي مُودِك حابِب التِّكرار
كُل الحاجات حوالينا مخنوقَه
أرواحنا حتَّىٰ بُكاها فـِـ زيادَه
من غُربَه كُربَه وصايرَه مَوبوءَه
والحُزن فيها ما كفِّش العادَه
يوماتي نازل سَنِّ سكاكينُه
راصِد قلوبنا بوجعُه وأنينُه
فاتِح علينا عيونُه وسنينُه
وان قولنا كافي نلقىٰ لُه إعادَه

                 محتاج أفضفض
مسعد سليم