للأسف نفس الحكايه
هيَّ هيَّ مفيش كلام
أصل معروفه النِّهايه
مُؤسِفه وأسوأ كمان
ياه علىٰ الحظِّ التَّعيس
لمَّا بيعلِّي الرِّخيص
عَــ اللي صانُه وكان حريص
واللي كان ليه الامان
آه يا دنيا يا مفتريَّه
لسَّه إيه تاني فْــ جِرابِك
نِفسي ألقالِك تَوْرِيَه
تِفحم السَّيد جنابِك
تِوجع الظَّلمه اللي فيكي
اللي زادوا فْــ مآسيكي
واللي هُمَّا اسوأ ما بيكي
واللي فتحوا بظُلم بابِك
هوَّ ليه الظُّلم سايِد
عَــ اللي شاربين العذاب
كُلِّ يوم دافعين ضرايِب
لا ويوماتي فيه الجراب
مُش كفايه ولا لسَّه
كُلِّ يوم بتضخِّي كارثه
والمزاد دايما بيرسا
عَــ اللي مِن فرحِك غياب
إرحمي يا دُنيا كافي
البريء مُش حِمل طيشِك
لجل يشرب مُرِّ صافي
بِسم انُّه أكل عيشِك
أرحمي انتي وناسِك
خفُّوا حبَّه مُرِّ كاسِك
بطَّلي مِن سِمِّ راسِك
راعي انُّه فْــ يوم ما عاشِك
قولي للظَّالمين كفايه
ربِّنا قادر عليكُم
كل يوم ليكُم جِنايه
بُكره راح تُحصد إيدكُم
وقتها ما تدقُّوا باب ..
أهلُه رَويتُوهُم عذاب
وادفعوا أصعَب حساب
عن مُسلسل مآسيكُم
نفس الحكاية
مسعد سليم
ليست هناك تعليقات:
إرسال تعليق