مِسامحَة
==========
مسامحه برغم ألامي
وجَرح مازال بوجداني
عايش فيها ومانسيها
ومَرَّر طَعم أيَّامي ..
مِسامحَه برغم أوجاعي
وحُزن لقلبي كان راعي
حاولت كتير افوق مِنُّه
لكن بحصاري كان ساعي
مِسامحَه ولسَّه بَدعيلَك
وبَهرَب منِّي وبَــ اجيلَك
اعاتبَك عَن زَمَن ماضي
ما كَفِّش ويلي ولا ويلَك
مِسامحَه ولسَّه بتصبَّر
بذكرىٰ .. قَبل ما تمرَّر
حياتنا بكَسر فَرحتنا
وقبل حَتَّىٰ ما تقَرَّر
مِسامحَه لإنِّي حَبِّيتَك
وفوق الدُّنيا بَدِّيتَك
وكُنت بلادي وحدودي
ورغم الجرح ما نسيتَك
مِسامحَه وَفاء لماضينا
وصاينَه كُل أمانينا
برغم نهاية القصَّه
وفُرقَه ليها ما سعينا
مِسامحَه لإنِّي حَسِّيتَك
رَحَلت اكمنِّي حَبِّيتَك
كأنُّه اعتذار مِنَّك ..
بعمرَك قولت ياريتَك
يعود بيك الزَّمَن تاني
وما تكررشي أحزاني
وهتداوي وَجَع قلبي
ومش هتكون عليه جاني
مِسامحَه رغم دَمعاتي
وليل ما كَفِّ لي آهاتي
بجرح كرامتي وشعوري
وحُزن فْــ بُوحي وسْكاتي
مِسامحَه مِسامحَه ومْسامحَه
يا أجمل سُنبُلَه وقَمحَه
كانت فـِـ حياتي ولروحي
خطفها الموت بلا رحمَه
مِسامحَة
مسعد سليم
ليست هناك تعليقات:
إرسال تعليق