أكيد زعلان كلمات المبدع مسعد سليم

أكيد زعلان
مسعد سليم
========•
أكيد زعلان أكيد مخنوق
وحاسس حُزن غير مسبوق
عشان شايف وجع إنسان
كرامتُه ترجموها عقوق
أكيد زعلان عشان لسَّه
دموع قلبي ماهيش خالصه
ومش عارف أوقَّفها
لأنِّي حزين من القصَّه
أكيد زعلان من الجاري
وحاسُّه بكَّىٰ أفكاري
لدرجة انِّي من حُزني
بينزل دمع أشعاري
أكيد زعلان عشان إنسان
بيكره انِّ حدِّ يُهان
ويبقىٰ فُرجَه للعالم
وأبسط حقِّ ليه عطشان
أكيد زعلان من الصَّدمه
ومن أحزان كتير قاطمه
ومن قسوة بشر بينَّا
شُعور الرحمه ليه عادمه
أكيد زعلان من الاحداث
ما طعم الظُّلم حاسُّه رصاص
وإيه اللي يهون جرح
كلامنا عنُّه بالالغاز
أكيد زعلان فوق العادة
لأن المُرِّ دا زياده
وفايق قُدرتي وطاقتي
وخايف يبقىٰ لُه إعاده
أكيد زعلان بشكل مُخيف
ما كفِّ الحُزن جانا عنيف
مرار السَّحل مُش هيِّن
ببيتك ولَّا حتَّىٰ كَـــ ضيف

                أكيد زعلان
مسعد سليم