#معانى_الغربة
يا كمنجاتى قسِّم سلطن
واعزِف لينا ويا كلامى أحلى أغاني
ترجَع بينا لأحلى زمان
شارع هادي كله حبايب
والْدِي وجارنا إللى قُصادنا الناحية التانية
كانوا ف حُكْمِنا زي قرايب
أنا وحسام وجارتنا الغالية
أول أولاد جريوا ف بيتنا
قبل ما حتى يجينا اخوات
كنا تلاته بنمشي التاتا
كانت فرحَة لما مِشيت
عدِّت أيام فجاة لَقيت
كِتروا اخواتنا ف غمضِة عين
كل الأيام زي اخواتها
واللي بنعمله فيها نعيده
نطْلَع نجري أوام عالسلم
ننزِل ننهج م التَّعَبان
عينَّا تفتّح سوا ع الدنيا
زينة بتملى الشارع فرحة
رمضان جاي وحلّوا يا حلّوا
وفانوس طولُه ياناس من طولْنا
نتمِلى فرحة لما ينوَّر م العصرية
نعرف ان الكحك ابو سكر
هوا أوانه الأيام ديّا
فجأه كبِرٌنا
وأصبح بينا حواجز ياما
عيب و زعيق وعتاب و ملامة
لما بنطلب نطلع نلعب
إنتوا كبرتوا وبينكم بنت
عيب مايصحش
والنبى نطلع مرة يا طنط
أسمع شخطة أمى تقول
إجري اتفضل أدخل أوضتك
أدخل أوضتي وأقفل بابي
واجري أوام على شباكي
يمكن تيجي قصادي و اشوفها
وانا مش فاهم
إيه اتغير بس ما بينا !
طولنا شوية؟ طب إيه يعنى !
حتى جارتنا صبحت تخجل لما باشوفها
واما اقابلها ف يوم ع السلم كلمة ورد !
باين إن كلامهم صح وجد الجد
حتى ف يوم لو قاعده قصادي
أسرق نظرة مع اغنية سوا نسمعها
كأنه سؤال
والمح رد ف نن عنيها
خجلان حاير
مرة تبص يمين لمامتها
ومره تبص لعمو شمال
خايفة تقرب
ودي كانت أول مرة اتغرب
درس وخدته قبل ما احصل سن الرشد
وبدأت افهم
أول حصة قالتها الدنيا وأول حرف
قبل ما ندرس جبر وخط ونحو وصرف
إن الغربة أكيد جيالك
مهما هتجري أو راح تهرب
لازم جوا القلب هترشق
شوف الغربة ..
غربة حي وغربة بيت بتصاحبه سنينك
لما بتكبر تنقل غيره
وتعيش غربة عفشه .. حيطانه .. ودقة بابك
غربة مدرسة تقفل بابها لما بتكبر
وتسيب فيها أعز احبابك
غربة أخ وأخت تسيبك
لما يجيلها النص التاني
تفضى عليك الدنيا لوحدك
رغم ان انت ف نفس البيت
غربة نفسك
آه لو جيت بصيت ف مرايتك
ولقيت غربة نفسك فيها
غربة صورتك وانت بتكبر
غربة صوتك لما بيخشن
غربة شعرك لما بيقلع ضلمة ليلُه
تقدر تفهم بعد كلامي
معنى الغربة أكيد بقى واضح
يعنى الغربة ماهياش غربة أهل وبيت
ولا هياش غربة أوطان
صاحب نفسك ويا مكانك
عيش متصالح
اخلق ليك ف الدنيا مطارح
دايما خليك وسط الناس
عيش وياهم غنى غناهم
قد ماتقدر عيش جواهم
تقدر تدفن غربة نفسك
جوا ف قلبك
وتعيش ويا الدنيا كأنك ليها حبيب
بعد ماعشت العمر بحاله
فاكر إنك فيها غريب
#سعد_البنا
ليست هناك تعليقات:
إرسال تعليق