رسايل مخفيه
الرساله الثامنه والعشرون
================
محبوبتي
بعد السلام
والأحترام
وكل إحساس شايله ليكي
جوايا اكبر م الكلام
إن كنت مش بصعب عليكي
يبقي علي الدنيا السلام
لكن حرام
إن ابقي عايش وسط حاله
من الوجع من غير وجودك
أيوه حرام
إنك هتبقيلي استحاله
ولا هقدر اتخطا لحدودك
لكن صحيح
فكراني ولا نسيتي عهدي
وقولتي هرضا بالنصيب
فكره بإني وفيت بوعدي
وعد مافيش بعدك حبيب
يادي النصيب
يبقي كدا مكتوب عليا الفرحه ماتكملش يوم
كان نفسي بس تكوني ليا كان نفسي ارتاح م الهموم
هو النصيب
جوايا يغزل من حروفك
دواوين حنين لحلم فات
جوايا بس اقدر اشوفك
بين الخيال والذكريات
كان القدر حاكم ظروفك
وإنك هترضي بالسكات
ملعون وجع يرضا بخوفك
ملعونه فيا الذكريات
أنا قلبي مات
مع كل لحظه تفوت عليا وهي هي الحاله ديا
كنتي افضلي بس شويه تشبع كدا منك عينيا
كنتي افضلي واقسي عليا وانا كنت هرضا بضعفي فيا
دي هي هي
كل اللي باقي بس منك
قلبي اللي ساكن عمري بيا
كل اللي باقي يا عمري منك
كل رساله تكون مخفيه
وحق اللي وهب روحي
محبه تكون لوجه الله
وحق اللي وجع روحي
انا مسامحك لوجه الله
ودا كله لاعيب ولا ضعف ولا حتي ياستي حرام
ماكل احساس شايله ليكي. جوايا اكبر م الكلام
وان كنت مش هصعب عليكي
يبقي علي الدنيا السلام
===================
✍️ احمد طلبه
ليست هناك تعليقات:
إرسال تعليق