مش هاموت دلوقتى
لسه عندى حاجات كتير
اول ماهيسمح وقتى
ح اركب احلامي واطير
عندى حاجات كتير متأجله
حافظها بالترتيب متجدوله
وكاتبها من زمان على ورقه
بقيت لونها اصفر متبهدله
#
اولها ها انام واصحى بكيفى
ولا توقيت شتوى ولا صيفى
يقلب لى ليلى و نهارى
قهوتى هاشربها على رواقه
وانا قاعد استمتع ب خناقه
بين عصفور جاوا وكنارى
ها افتح للشمس عشان واقفه
بردانه و عايزه تدخل تتدفى
وتصبّح على اوراق الورد
وصلاة الضحى قبل امّا انسى
وتاخدنى بدال الحاجه خمسه
واستغفر ربنا واقرا الوِرد
ولا هام ولا عاجل ولا ميديا
بحلم بحياة رايقه وهاديه
زى ما كنا عايشينها زمان
هبعد عن كل مشاكل الارض
ولا هاشغل بالى تانى بحد
مين ؛ فين او كنا وكان
اهى دى الاحلام اللى فبالى
ايام و سنين شاغله خيالى
ماببطلشي فيها تفكير
وكمان كان عندى حلم بسيط
لو عنّى يقولوا بعد ما اموت
كان انسان عنده ضمير
#شريف_خاطر
ليست هناك تعليقات:
إرسال تعليق