فقر دين كلمات الشاعر مسعد سليم

الحكايه فقر دين
مش تخلُّف أو غباء
هوَّ دا مرضنا اللعين 
اللي محتاج للعلاج
بنتكُم هانت عليكم
وبسهوله آوام نسيتم
اللي كات قدَّام عنيكم
صوره حيَّه للعطاء
الطَّبيبه واحده منكم
مش عَدِوَّه أو مُصيبه
حتَّىٰ موتها كان عشانكم
رفضكُم للدَّفن عيبه
عَدوِة ايه بتقولوا عنها
اللي بتردُّوا بيبانها
انتوا والَّه أشرِّ منها
راجعوا أفعالكوا المُريبه
هو دا ردِّ الجِّميل
عـَـ اللي ضحَّىٰ بعُمرُه لينا
ننكروا ومالُهش خير
عادي إنُّه يهون علينا
هيَّ فين الرَّحمه فين
إحنا فعلآ مُسلمين
ولا بسِّ يدوب روتين
ولإصول الدِّين نِسينا 
آه يا أُمَّه عفيفه كُنتي
قِدوه حسنه للجميع
ليه لأخلاقك ما صونتي
لمَّا صبح الحال وضيع
إيه اللي غيَّر فيكي ناسِك
إيه اللي خلَّىٰ المرِّ كاسِك
هان عليكي ليه تراثِك
والخريف تاخديه ربيع
قصِّة الطَّبيبه صعبه
شرح وافي لموت قلوبنا
وان لسَّه بقايا رحمه
كُل يوم تِكشِف عيوبنا
العلاج وحدُه فـِـ ديننا
لجل يرجع تاني نورنا
والمحبَّه تعود شعارنا
بعد درس كتير تِعِبنا

              فقر دين
مسعد سليم